母親節快到，各位媽媽有什麼願望？孩子親手畫給妳的母親節卡？一束康乃馨？還是孩子健康、快樂成長？我們訪問了十位媽媽，當中是否也道出你的心聲呢？

10個母親節願望大放送

林太：「我想瞓到自然醒就最好喇！」

張太：「希望母親節嗰日可以安在家中，自得其樂，享受一下悠閒時光。」

陳太：「我希望母親節嗰個周末，阿仔無乜功課、默書測驗，輕輕鬆鬆，等我哋可以hea吓。」

梁太：「我最想仔女同老公放我半日假，同好耐無見嘅朋友high tea。」

李太：「如果可以一家人出去吃飯，等我唔駛煮飯同洗碗就好喇！」

黃太：「好似平日咁就得，唔駛嘥錢慶祝喇！」

伍太：「我想好好打扮一下，化個靚妝，著件新衫出去慶祝。」

劉太：「自從有咗三個小朋友之後，我嘅母親節願望係可以成為一位全職媽媽，因為小朋友大得快，我唔想錯過佢哋每一個成長階段，希望可以陪伴佢哋快樂成長。」

陳太：「今年係我第一個母親節，希望BB能夠健康快樂地成長，呢個願望雖然平凡，但的確係每位媽媽最大嘅心願，我亦會時刻提醒自己唔需要俾小朋友最好的，而是俾最合適的，希望自己可以做到。」

鄧太：「自從做咗媽媽之後，每年母親節嘅願望都會隨著小朋友長大而變得唔同，但有一個願望係永恆不變，就係佢能夠健康快樂地成長，做個有品德嘅人。」

給自己十分鐘 愛錫自己

綜觀以上十位媽媽的母親節願望，除了希望孩子健康快樂之外，有不少媽媽只是想輕輕鬆鬆與家人或朋友共聚，不用埋首於孩子的學業，做自己喜歡但久違了的事情，悠然地度過節日。這些願望雖是如此平凡，卻是不少媽媽的心聲，反映了很多時媽媽都忙於照顧家庭而犧牲了自己的需要。

我們鼓勵各位媽媽好好愛錫自己，獎勵自己。例如：沖一杯花茶、享受一杯咖啡、跑步、約會朋友、購物；甚至每天給自己十分鐘時間放空，什麼也不做、什麼也不想。起初可能會很不習慣，覺得很奢侈，因為都市人都習慣忙忙碌碌，當靜下來的時候，會有很多的思緒飛過，但持之以恆，可以沉澱混亂的思緒，心情漸漸變得平和，更能敏感自己及別人真正的需要，避免筋疲力竭（burn out）。

希望各位媽媽就在母親節好好學習放鬆自己，愛錫自己，預祝母親節快樂！

以上部份資料由慈慧幼苗教育主任資深註冊社工吳彩輝姑娘提供