某天在街上碰見朋友，我倆大談近況之際，她向我分享最近在網上瘋傳的短片，實在令我啼笑皆非。

朋友：「早排喺面書見到呢條短片，內容講有個小朋友不斷扭計同大喊，但當媽媽拿起手機同佢影相時，小朋友瞬間笑返，認真神奇。」

我半帶懷疑地問她：「你冇同你女兒做呢個實驗嘛？」

朋友尷尬地道：「我真係有試過喎，昨天女女喊得好勁，我咪即刻拎部手機出來同佢影相，叫佢望住笑，點知佢不單止唔笑，仲喊得勁咗，跟著我同佢講『咁張相好醜樣架﹗』，佢就再喊勁啲，呢種方法證明係唔work。」

聽到朋友的坦白，我不知笑她可愛，還是欣賞她有探究精神………

解說

媽媽企圖以拍照轉移小朋友的情緒，無論這種方法是否湊效，媽媽期望要小朋友由不開心的情緒立即變回開心，都不是恰當的情緒處理方法。此方法未能讓小朋友察覺及接納自己的情緒，同時亦不能讓他們學到宣洩情緒的適當方法。

家長需要知道，每個人都有情緒，無論是正面（例如：快樂、輕鬆、滿足）或負面（例如：悲傷、憤怒、害怕），都應被接納為正常反應。如何宣洩、過渡及轉化情緒，反而是父母需要協助小朋友建立的重點。當小朋友出現情緒時，首先，父母可以對小朋友說：「你依家好唔開心，所以你喊，喊出來就會舒服一點。喊完、冷靜咗我哋先再做其他嘢啦。」這番說話的目的，讓小朋友覺察自己的情緒之餘，同時感受到父母接受自己有情緒。如果小朋友情緒失控，父母可選擇運用「冷靜區」，讓小朋友及父母都有一個空間及時間冷靜。彼此冷靜後，再繼續活動，才是正確的情緒處理。