會員註冊

某天，我坐在公園的椅子休息，旁邊坐了幾位媽媽，正熱烈地討論一些關於與小朋友玩遊戲的話題。在好奇心「邀請」下，我當然樂意傾聽她們的分享！

媽媽A：「平時喺屋企你哋會同小朋友玩咩？我同女女玩角色扮演遊戲，好似我扮老師，佢扮學生，可以教佢講唔同語言，近期教佢講普通話。」

媽媽B：「我會同仔仔玩圖卡，等佢學多啲簡單嘅英文字，近期要佢記到自己個名。但佢仲係冇咩興趣，要追著佢玩。」

媽媽C很興奮的介紹：「前日，我設計咗一款好玩嘅遊戲同仔仔玩，首先要佢認出唔同形狀，再認唔同顏色同埋上面既數字……之後要佢就唔同要求拼出唔同形狀。又可以學數學、形狀、顏色，同埋手眼協調添。」

大部分媽媽都不明白遊戲，於是媽媽C解釋了兩三次。

媽媽D：「嘩，我聽完都仲係唔明，大人都覺得複雜，你個小朋友玩成點？」

媽媽C：「佢專注力唔夠，次次聽到中間就走開了。」

幾位媽媽唯唯諾諾地輕輕帶過，散會；而我「食完花生」都離開。

解說

很多父母都希望透過遊戲讓子女學習更多，將遊戲視作教學用途，但父母首要明白玩遊戲的目的，最重要是加強親子關係。當然，遊戲也能促進小朋友的身體成長、宣洩不同情緒、提升社交能力、發展創意思維或解難能力等。不過，假如父母將學習元素放得太重，很容易會忽略過程之間的互動及親密感覺，導致小朋友抗拒與父母遊戲，最後便得不償失。

如果父母想在遊戲中加入學習效果，過程中必須包含不同的活動形式、富趣味和親子元素在內。忙碌的父母難得與子女一起遊戲時，能享受快樂的親子時光是最重要的。

正如以上例子，幾位媽媽與子女玩遊戲的功能主要以學習為主，更有媽媽設計過於複雜的遊戲，令小朋友失去玩樂的興趣，更遑論有學習效果；只要留意小朋友的參與反應，便可知道他們想傳遞什麼訊息給媽媽。小朋友對家長安排的遊戲沒有興趣，真的只是因為小朋友的專注力低？這個問題值得父母深思。