會員註冊

上星期與一班家長朋友聚會，有位喜歡show off的朋友分享她與子女親子伴讀的心得﹕「我每次同歲半嘅女女講故事時，佢好留心聽我講故事，會自動舉起食指，同我一齊指住本書，超有成功感！」

追問之下，原來這位朋友一直都用普通話講故事給小朋友聽。大家好奇地問她原因何在。這位朋友理直氣壯地答：「廣東話同寫出來嘅書面語係有唔同，例如你會講『凳』，但寫出來係『椅子』，我唔想小朋友混淆同讀錯字，所以一直都用普通話來講故事。」當時，大家都好羨慕這位朋友，覺得好有道理，紛紛表示會回家「實證」。不過，我都有勸大家冷靜，指出伴讀重點並非語文訓練，反而是親子關係。

果然過了數天，大家在WhatsApp Group中訴苦了。

朋友A說：「昨晚我用普通話同女女做親子伴讀，點知佢不斷打哈欠﹗佢從未試過比呢個反應，成個過程好唔專心，我覺得自己好失敗。」

朋友B和應：「我都有同仔仔講故事，講到中間，佢話唔明我講咩，先發覺自己啲普通話原來好差。」

大家你一言我一語，最後有朋友忍不住問這位朋友：「你大仔係唔係都鐘意聽用普通話你講故事？」

過了一段時間，這位朋友終於回覆說：「K3個時佢有問過我點解唔用廣東話來講故事，我就話因為我講普通話先好聽，唔係就唔講喇。佢話學校嘅老師都係講廣東話，講得好好，之後佢就無要求聽我講故事喇。」

原來大家當日只知部份事實!  大家又學了一課喇。

解說

就以上情景中，家長要考慮小朋友年齡來選擇伴讀的重點。伴讀基礎應該是建立親子關係及培養閱讀興趣為主。如果孩子沒有興趣跟你伴讀，其他的學習目的，也不能達到。就如同情景中媽媽的大仔般，不再聽媽媽伴讀。另外，家長亦需考慮自身的能力，如以上情景中的家長B，自己的語言能力表達欠佳，就不應執意去做，結果苦了自己，又苦了孩子。

父母每天忙碌工作或處理家務後，如果可以抽出五至十分鐘時間，在寧靜和輕鬆愉快的環境下，跟孩子生動演繹的說故事，過程中，大家可以對故事的內容及情節，表達個人的見解，加深彼此的了解，和諧溫馨的親子關係便能漸漸地建立起來。而孩子在父母的輔助下，從閱讀中獲取新奇和愉快的經驗，自然增加閱讀的興趣，樂於投入閱讀活動。父母每天如能定出固定時間跟孩子說故事，便能輔助孩子養成良好的閱讀習慣，對孩子及後自行閱讀學習奠下基礎。