會員註冊

農曆新年將至，相約好朋友出來暢談近況，她說了一則讚賞兒子的趣事，令我啼笑皆非。

我們在餐廳坐下後，朋友便急不及待地向我說：「你上次教咗我，當見到小朋友做咗好行為時要用『快、真、準』嘅技巧去讚佢，上星期我喺屋企實習一吓讚我嗰仔，點知就出事喇！」

我立即好奇地問：「出事？快啲講嚟聽吓！」

朋友仔細地描述：「當時阿仔拉咗幾張紙巾出嚟用，跟住將紙巾掉入垃圾桶，於是我就讚佢：『你真係好乖呀！』佢嗰刻好開心，報以一個非常燦爛的笑容。點知過咗一陣，我見到阿仔不停咁拉啲紙巾出來，仲用好期待嘅眼神望住我添，想我繼續讚佢。」

朋友說話未完，我已經捧腹大笑，「證明你讚賞小朋友嘅技巧仲有進步嘅空間喇！」

朋友尷尬地笑一笑：「係喇！後來我反省到原來我讚佢唔夠『準』，令佢以為我讚佢拉紙巾係好行為，其實我係想讚佢有手尾，將用完嘅紙巾掉入垃圾桶，以後讚阿仔真係要準確啲。」

「係呀！最重要係讚清楚咩行為做得好，咁樣佢先會明白㗎，一句乖，佢真係唔知道邊個行為先係乖。加油呀！你會越嚟越識讚！」我鼓勵朋友。

解說

上次講解了讚賞小朋友的好處(http://bit.ly/2rwbuCs)，今次詳細分析讚賞的具體技巧。當讚賞小朋友時，父母要掌握「快、真、準」的技巧，這樣才可以讓小朋友明白所做的良好行為，以及帶來正面的效果。

「快」：即時，父母要把握時機，最好在小朋友做好行為後兩分鐘內即時讚賞他，不宜過早或過遲，因為有些父母會在小朋友還未做完良好行為便稱讚他，又或者小朋友做了良好行為後，父母過了很長時間才作出讚賞，小朋友已忘記了當時情況，這樣會事倍功半。

「真」：真誠，表情和言行要一致，最好面帶微笑及用欣賞的眼神去讚賞小朋友。曾有實驗證明面部表情比語言在傳達訊息時更具影響力，在實驗中一位母親責備BB時面帶笑容，但BB反而向她報以微笑，完全不認為母親是責備他；之後母親用兇惡的表情讚賞BB，BB則感到害怕並哭起來，感受不到母親對他的讚賞。由此可見，父母運用恰當的表情和語氣去讚賞小朋友是非常重要的。

「準」：準確，清楚具體地描述小朋友做得好的地方，例如：「你今日幫媽媽掉垃圾，真係好幫手！」不宜只用「叻」、「乖」等過於空泛的形容詞來概括描述小朋友的好行為。